ខេត្តតាកែវ៖តាមប្រភពព័ត៌មានពីប្រជាពលរដ្ឋ បានអោយដឹងនៅថ្ងៃទី២៣ ខែធ្នូ ឆ្នាំ២០២០ នេះ ថា សង្វៀនជល់មាន់ដុះស្លែរ របស់ តាប៊ុន និង ឈ្មោះ ហេង កំពុងដំណើរការយ៉ាងរលូននៅស្រុកព្រៃកប្បាស ក្នុងអន្តរកាលនៃការទប់ស្កាត់ ជំងឺកូវីដ-១៩ ។
ក្រឡេកមើលចំណាត់ការរបស់សមត្ថកិច្ច វិញ នៅពុំទាន់ឃើញមានការបង្ក្រាបនៅឡើយទេ ដោយមិនដឹងមូលហេតុ អ្វីឡើយ ។
ដោយសារតែពុំឃើញមានសមត្ថកិច្ចចុះបង្ក្រាប នេះ ទើបប្រជាពលរដ្ឋ បានអោយដឹងថា សង្វៀនជល់មាន់ បង្កប់បៀរអាប៉ោងដ៏ល្បីល្បាញរបស់តាប៊ុន និង ឈ្មោះ ហេង បើកលេងយ៉ាងគគ្រឹកគគ្រេង ស៊ីសងចាញ់ឈ្នះរាប់លានរៀលស្ទើររាល់ថ្ងៃ តែបែរជាលោកអធិការស្រុកព្រៃកប្បាស មិនឃើញចុះបង្ក្រាបសោះ ។
ពលរដ្ឋ ដដែល បានដាក់ការសង្ស័យថា ការមិនទាន់ឃើញចុះបង្ក្រាប នេះ សង្ស័យមានមូលហេតុ អ្វីផ្សេង នៅពីក្រោយខ្នងហើយមិនដឹង ។
ចំណុចពិសេសមួយទៀត ត្រូវបាន ប្រជាពលរដ្ឋដឹងរឿងច្បាស់ អះអាងថា សង្វៀនជល់មាន់បង្កប់បៀរអាប៉ោង នេះ បើកលេងចល័តក្នុងស្រុកព្រៃកប្បាស ជួនកាល លេងនៅជិតវត្តចារ ឃុំចារ ឬ បើកលេងនៅអាការឈូក ឃុំស្នោរ ពេលខ្លះមកលេងនៅភូមិកាចិល ឃុំកំពង់លាវ ឬ ជួនកាលលេងនៅឃុំបាអង្កាម និង ឃុំផ្សារជ្រៃ ។
ប្រភពព័ត៌មាន ដដែលបន្តថា ម្ចាស់សង្វៀនជល់មាន់ខាងលើនេះ សង្ស័យជាខ្សែស្រឡាយលោកអធិការ ទេដឹង បានជាល្បែងទាំងនេះ បើកលេងបានយ៉ាងរលូនដោយគ្មានការរំខានពីសមត្ថកិច្ចមូលដ្ឋាន នោះឡើយ ហើយលេងបានស្ទើររាល់ថ្ងៃក្នុងមួយថ្ងៃៗជល់ចាប់ពី១០គូរឡើងហើយចាញ់ឈ្នះពី១០លានទៅ២០លានរៀល ឯណោះ ។
ទន្ទឹមនឹងការបើកអោយមានលេងល្បែងស៊ីសងយ៉ាងគគ្រឹកគគ្រេង នេះ ប្រជាពលរដ្ឋមានការព្រួយបារម្ភនិងភ័យខ្លាចយ៉ាងខ្លាំង ដោយកន្លងមកក៏ដូចជាបច្ចុប្បន្ននេះ តែងតែមានអំពើចោរកម្មលួចទូកម៉ាស៊ីន កាណូត លួចកាច់ករ យកម៉ូតូនិងគាស់ផ្ទះយកទ្រព្យសម្បត្តិរបស់ពួកគាត់ជាហូរហែរ ព្រមទាំងកើតអំពើហិង្សា ក្នុងគ្រួសារ ហេីយពេលខ្លះទៀត មានការវាយតប់កាប់ចាក់គ្នាក្នុងវង់ល្បែងនោះ តែម្តង ។
ចំពោះបញ្ហានេះ ទាំងអស់នេះ ប្រជាពលរដ្ឋ បានសំណូមពរអោយលោក ញ៉ែម ស្រស់ អភិបាលស្រុកព្រៃកប្បាស ក្នុងនាមជាប្រធានគណៈបញ្ជាការឯកភាព ព្រមទាំងលោក ឡេង ប៊ុនឡុង អធិការនគរបាលស្រុកព្រៃកប្បាស មេត្តាមានវិធានការបង្ក្រាបផង ដើម្បីសេចក្តីសុខក្នុងមូលដ្ឋាន និង ចូលរួមការប្រមូលផ្តុំគ្នាច្រើន ក្នុងអន្តរកាលនៃការទប់ស្កាត់ការរីករាលដាលជំងឺកូវីដ-១៩ ផងដែរ ៕ប្រភពពី÷ឆាយនាថ
