រាជធានីភ្នំពេញ៖ បុរសម្នាក់បើករថយន្តបត់បម្រុងយកទៅដាក់មុខផ្ទះដើម្បីរៀបចំអីវ៉ាន់ធ្វើដំណើរទៅខេត្ត ដោយខ្វះការប្រុងប្រយ័ត្នបានជ្រុលទៅបុករួចកិនចំពីលើក្បាលបណ្តាលឲ្យស្លាប់ពេលបញ្ជូនដល់មន្ទីពេទ្យ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង ១២ និង៣០ នាទីរសៀលថ្ងៃទី១៦ ខែមករា ឆ្នាំ ២០២១ ស្តិតនៅក្នុងបុរីលឹម ឈៀងហោ តាមបណ្តោយផ្លូវលេខ២ ផ្ទះលេខ១៨ A1EO ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
សពក្មេងស្រី ឈ្មោះ អូ អាត់នីតា ភេទស្រី អាយុ៣ឆ្នាំ មានស្រុកកំណើតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
ប្រភពព័ត៍មានពីកន្លែងកើតហេតុបានឲ្យដឹងថាមុនពេលកើតហេតុគេបានឃើញជនរងគ្រោះបានរត់លេងនៅមុខផ្ទះជិតនិងកន្លែងកើតហេតុស្រាប់តែភ្លាមៗនោះដែរ ក៏មានបុរសម្នាក់បានបើករថយន្តម៉ាក ម៉ាស ស្តា មួយគ្រឿងពណ៍សពាក់ស្លាកលេខ ភ្នំពេញ 2-BG 0831 បានបើកទៅមុខគោលបំណងប្រុងនិងបត់យករថយន្តទៅដាក់និងមុខផ្ទះ ដើម្បីរៀបចំអីវ៉ាន់ទៅការមិត្តភក្រ្ត័នៅខេត្តកំពត ខណៈបើកមកដល់ចំណុចកើតហេតុស្រាប់តែជ្រុលចង្កូតបុកទៅលើក្មេងស្រីអាយុទើបតែ៣ ឆ្នាំម្នាក់រួចកិនពីលើចំក្បាលបណ្តាលឲ្យរងរបួសធ្ងន់ តែជាអកុសលបានស្លាប់ពេលបញ្ជូនដល់មន្ទីពេទ្យ ចំណែកម្ចាស់រថយន្តបង្កត្រូវឃាត់ខ្លួនភ្លាមៗ បញ្ជូនទៅអធិការរដ្ឋាននគរបាលខណ្ឌដង្កោរងចាំធ្វើការដោះស្រាយគ្នានៅពេលក្រោយ។
ក្រោយពេលកើតហេតុសមត្តកិច្ចមូលដ្ឋានបានចុះមកដល់ រួចបានទំនាក់ទំនងទៅសមត្ថកិច្ចជំនាញចរាចរណ៍ខណ្ឌដង្កោ ចុះមកទីតាំងកើតហេតុធ្វើការវាស់វែងយករថយន្តបង្ករទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំធ្វើការដោះស្រាយគ្នាពេលក្រោយតាមផ្លូវច្បាប់ ចំណែកសពជនរងគ្រោះ ក្រោយធ្វើកំណត់ហេតុរួចសមត្ថកិច្ចប្រគល់ឲ្យសាច់ញាតិយកទៅធ្វើបុណ្យតាមប្រពៃណី។
