អាងខ្លួនជាមន្ត្រីយោធា! ​បើករថយន្តគៀររបងផ្ទះពលរដ្ឋរួច ចង់បង្កហិង្សាដាក់ក្រុមអ្នកសារព័ត៌មានទៀត

ភ្នំពេញ​៖​ មន្ត្រីយោធា​ម្នាក់ស្រវឹងធ្លាក់ភ្នែក បានបើករថយន្តមួយគ្រឿងម៉ាកCRVទៅប៉ះនឹងរបងផ្ទះប្រជាពលរដ្ឋមួយកន្លែង តែមិនឈប់ដោះស្រាយជាមួយម្ចាស់ផ្ទះទេ បែរជាព្យាយាមបើករត់ ត្រូវបានបងប្អូនប្រជាពលរដ្ឋដេញចាប់ឃាត់បានមកវិញ​ បម្រុងបង្កហិង្សាដាក់អ្នកសារព័ត៌មានបន្ថែមទៀត។ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងកាលពីវេលាម៉ោង០៨ យប់ថ្ងៃទី១៤ ខែមីនា​ ឆ្នាំ២០២១ នៅតាមបណ្ដោយផ្លូវបេតុង ចំណុចមុខផ្ទះលេខ៨១Aផ្លូវលេខ៣C ស្ថិតក្នុងភូមិទ្រា៣ សង្កាត់ស្ទឹងមានជ័យ១ ខណ្ឌមានជ័យ ។ប្រភពព័ត៌មានពីកន្លែងកើតហេតុ បានឲ្យដឹងថា​ មុនពេលកើតហេតុ គេឃើញបុរសជាមន្ត្រីយោធាម្នាក់បើករថយន្តម៉ាក CRVមួយគ្រឿង​ ពណ៌ទឹកប្រាក់ពាក់ស្លាកលេខភ្នំពេញ2H-3920 ធ្វើដំណើរតាមបណ្តោយផ្លូវបេតុង​ ទិសដៅពីកើតទៅលិច​។ លុះមកដល់ចំណុចក្បែររបងសាលាបារាំង ក៏បានរេចង្កូតទៅខាងឆ្វេងដៃ ជ្រុលទៅប៉ះនឹងរបងផ្ទះប្រជាពលរដ្ឋរងការខូចខាតបន្តិចបន្តួច តែបើកបររថយន្តបង្កព្យាយាមបើករត់ ត្រូវបានបងប្អូនប្រជាពលរដ្ឋ រួមទាំងក្រុមអ្នកសារព័ត៌មានផងដែរ ដេញតាមឃាត់បាន​ ស្រាប់តែមន្ត្រីយោធារូបនោះបញ្ចេញសកម្មភាពច្រងេងច្រងាងបម្រុងបង្កហិង្សាដាក់ក្រុមអ្នកសារព័ត៌មាន ថែមទៀត បង្កឲ្យមានការភ្ញាក់ផ្អើលដល់កម្លាំងសមត្ថកិច្ចមូលដ្ឋាន ចុះទៅធ្វើការសួរនាំ រួចបានយករថយន្ត និងមន្ត្រីយោធារូបនោះទៅប៉ុស្តិ៍នគរបាលរដ្ឋបាលស្ទឹងមានជ័យទី១ ដើម្បីធ្វើការសួរនាំ និងឱ្យធ្វើកិច្ចសន្យារួច ទើបអនុញ្ញាតឲ្យត្រឡប់ទៅផ្ទះវិញ៕