ភ្នំពេញ៖)អគ្គិភ័យបានឆាបឆេះផ្ទះប្រជាពលរដ្ឋមួយកន្លែងនៅក្នុងបុរីពិភពថ្មីឈូកមាសដាលឲ្យរងការខូចខាត ដូចជាម៉ាស៊ីនឆុងកាហ្វេ នឹងម៉ាសុីនវេចខ្ចប់កាហ្វេរួមទាំងម៉ាសុីនសម្រាប់កិនគ្រាប់កាហ្វេ ក៍ដូចជាម៉ាស៊ីនក្រឡុកកាហ្វេ នឹងធុងសម្រាប់ដាក់ទឹកកក អស់មួយចំនួនធំ តែសំណាងល្អមិនបង្កឱ្យឆេះរាលដាលដល់ផ្ទះប្រជាពលរដ្ឋជិតខាងឡើយ។
ហេតុការណ៍អគ្គីភ័យនេះបានកើតឡើងកាលពីវេលាម៉ោង០៦នឹង០៥នាទីព្រឹក ថ្ងៃទី១២ ខែសីហា ឆ្នាំ ២០២១នេះ ស្ថិតតាមបណ្ដោយផ្លូវលេខ៣១ ផ្លូវ-B ក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
យោងប្រភពព័ត៌មាននឹងរបាយការណ៍ របស់លោក វរសេនីយ៍ឯក ព្រហ្ម យ៉ន នាយការិយាល័យ បង្ការពន្លត់អគ្គីភ័យនឹងសង្រ្គោះ នៃស្នងការដ្ឋាននគរបាលរាជធានីភ្នំពេញ បានបញ្ជាក់ប្រាប់ឲ្យដឹងថាអគ្គិភ័យដែលបានឆាបឆេះផ្ទះលក់កាហ្វេមួយកន្លែងនេះគឺបណ្ដាលមកពីឆ្លងចរន្តអគ្គិសនី ។
ជនរងគ្រោះដែលត្រូវជាម្ចាស់ផ្ទះនោះមាន ឈ្មោះ ឱក សីហា ភេទប្រុស អាយុ៣១ឆ្នាំ មានមុខរបរជាអ្នកលក់កាហ្វេ បច្ចុប្បន្នៈ ស្នាក់នៅក្នុងភូមិកើតហេតុខាងលើ។
សម្រាប់ប្រតិបត្តិការសង្រ្គោះវិញ សមត្ថកិច្ចប្រើប្រាស់រថយន្តការិយាល័យបង្ការនិងពន្លត់អគ្គីភ័យ អស់ចំនួន០២គ្រឿង ប្រើប្រាស់ទឹកអស់អស់ចំនួន០១ឡាន ស្មើនឹង០៤ម៉ែត្រគូប ទើបអគ្គិភ័យមួយនេះបានរលត់អស់ទាំងស្រុងទៅវិញ នៅវេលាម៉ោង០៦នឹង៣៥នាទីព្រឹក ថ្ងៃទី១២ ខែសីហា ឆ្នាំ២០២១នេះដដែល។ រក្សាសិទ្ធិ៖)ដោយវុត្ថា
