បុរសម្នាក់សង្ស័យថាច្រឡំជាន់ហ្គាររថយន្តស្មានតែហ្វ្រាំងហោះធ្លាក់ចូលទៅក្នុងទឹកទន្លេ បង្កការភ្ញាក់ផ្អើលទាំងព្រឹក

កណ្ដាល៖) បុរសម្នាក់ស្ស័យថាច្រឡំជាន់ហ្គាររថយន្តស្មានតែហ្រ្វាំងទើបបណ្ដាលឲ្យរថយន្តរបស់គាត់ផ្លោងធ្លាក់ចូលទៅក្នុងទឹកទន្លេបង្កការភ្ញាក់ផ្អើលទាំងព្រឹកដល់ប្រជាពលរដ្ឋ តែសំណាងល្អមិនបង្កឲ្យមាននរណាម្នាក់រងការគ្រោះថ្នាក់នៅក្នុងហេតុការណ៍នេះទេ។

ហេតុការណ៍គ្រោះថ្នាក់គួរឲ្យភ្ញាក់ផ្អើលមួយនេះបានកើតឡើងកាលពីវេលាម៉ោង០៨នឹង៣០នាទីព្រឹក ត្រូវជាថ្ងៃទី១៥ ខែសីហា ឆ្នាំ២០២១នេះ ត្រង់ចំណុចនិងភូមិព្រែកគយ ឃុំព្រែកគយ ស្រុកស្អាង ខេត្តកណ្ដាល។

យោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថានៅមុនពេលហេតុការណ៍គ្រោះថ្នាក់នេះបានកើតឡើងគេបានឃើញបុរសម្នាក់បើករថយន្តម៉ាក់ហាយឡិនឌ័រពណ៍សមួយគ្រឿងពាក់ស្លាកលេខភ្នំពេញ2AN-1302 ក្នុងគោលបំណងឆ្លងដរព្រែកតូចទៅត្រើយម្ខាង មិនទាន់នឹងដល់កំពង់ដរផងក៍ស្រាប់តែជាន់ហ្គាច្រឡំស្មានតែជាន់ហ្រ្វាំងទើបបណ្ដាលឲ្យរថយន្តរបស់គាត់ហោះផ្លោងធ្លាក់ចូលទៅក្នុងទឹកទន្លេបាសាក់លិចបាត់ស្រមោលតែម្ដង នេះគឺពឹតជាមួយពាន់សំណាងហើយមនុស្សចំនួន០៤នាក់ដែលនៅក្នុងរថយន្តនោះ បានរួចផុតពីគ្រោះថ្នាក់នឹងសេចក្ដីស្លាប់ទាំងអស់គ្នា។

ក្រោយពេលកើតហេតុសមត្ថកិច្ចមូលដ្ឋានក៏បានចុះទៅដល់ដើម្បីត្រួតពិនិត្យរួចរាល់មើលឃើញថា រថយន្តបង្កនេះមិនមានការប៉ះពាល់ទៅដល់សម្បត្តិសាធារណៈនោះទេ ទើបសមត្ថកិច្ចព្រមឲ្យម្ចាស់រថយន្តរកជួលប្រជាពលរដ្ឋដែលជាអ្នកនេសាទចុះមុជចូលទៅក្នុងទឹកទន្លេដើម្បីរាវរករថយន្តដែលបានលិចទៅក្នុងទឹកនោះអស់រយៈពេលជិត០៤ម៉ោងទើបរកឃើញហើយក៏បានហៅរថយន្តស្ទូចឲ្យមកស្ទូចរថយន្តដែលបានលិចចូលទៅក្នុងទឹកទន្លេនោះឡើងពីក្នុងទឹកយកមកដាក់នៅលើគោក ហើយយកទៅធ្វើការជួសជុលដោយខ្លួនឯង។រក្សាសិទ្ធិ៖)ដោយវុត្ថា