កុំចេះតែហ៊ានបុរសពីរនាក់ក្លែងខ្លួនជាមន្ត្រីសមត្ថកិច្ចសាលាដំបូងខេត្តដើរទារលុយតាមទីតាំងសិប្បកម្មនិងរថយន្តដឹកឈើត្រូវជាប់ខ្នោះ

(ខេត្តឧត្តរមានជ័យ)÷ នៅល្ងាចថ្ងៃទី១៣ ខែសីហា ឆ្នាំ២០២១ ដោយមានការបញ្ជាផ្ទាល់ ពី លោកឧត្តមសេនីយ៍ទោ ហួត សុធី ស្នងការនគរបាលខេត្ត និងមានការ សម្របសម្រួលនីតិវិធី ពីសំណាក់  ឯកឧត្តម តូច សុភក្ដី ព្រះរាជអាជ្ញា នៃអយ្យការអមសាលាដំបូងខេត្តឧត្តរមានជ័យ កម្លាំងជំនាញរបស់ អធិការដ្ឋាននគរបាលស្រុកអន្លង់វែង បានស្រាវជ្រាវ និងឃាត់ខ្លួនជនសង្ស័យ ០២ នាក់ ពាក់ព័ន្ធករណីក្លែងបន្លំធ្វើជាសមត្ថកិច្ចមន្ត្រីសាលាដំបូងខេត្តឧត្តរមានជ័យ ដើរយកលុយពីប្រជាពលរដ្ឋរកស៊ីដឹកឈើ និងដឹកសិប្បកម្ម នៅស្រុកអន្លង់វែង និងស្រុកត្រពាំងប្រាសាទ ។

ជនសង្ស័យទាំងពីរមានឈ្មោះ ÷

១- លុន តុនឡេង ហៅ(ឡេង) ភេទអាយ៤៣ ឆ្នាំរស់នៅភូមិថ្នល់កែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ មុខរបរកសិករ ។

  ២- អៀម ប៊ុនធឿន ហៅ(អែល) ភេទប្រុស អាយុ ៣៧ឆ្នាំ រស់នៅភូមិថ្នល់បំបែក ឃុំអន្លង់វែងស្រុកអន្លង់វែង ខេត្តឧត្តរមានជ័យ មុខរបរកសិករ ។
ក្រោយពេលដែលសមត្ថកិច្ចឃាត់ខ្លួនដកហូតរថយន្តចំនួន ០១ គ្រឿងទូរស័ព្ទដៃ ០៣ គ្រឿងករណីនេះក្រោយជំនាញបានសួរនាំ ជនសង្ស័យទាំង ០២ នាក់ បានឆ្លើយសារភាពថា ពិតជាបានដើរយកលុយពីប្រជាពលរដ្ឋដែលរកស៊ីដឹកឈើ និងកន្លែងសិប្បកម្ម ក្នុងភូមិសាស្ត្រខាងលើពិតប្រាកដមែន។

បច្ចុប្បន្នជនសង្ស័យទាំង ០២នាក់សមត្ថកិច្ចជំនាញកំពុងតែកសាងសំណុំរឿងបញ្ជូនទៅតុលាការចាត់ការតាមនីតិវិធីដោយច្បាប់៕អត្ថបទស្រិតទីន