កំពង់ស្ពឺ÷ កម្លាំងសមត្ថកិច្ចចម្រុះសហការគ្នារវាងកម្លាំងនគរបាលនៃស្នងការនគរបាលខេត្តកំពង់ស្ពឺ និងកម្លាំងនគរបាលនៃស្នងការនគរបាលរាជធានីភ្នំពេញ កាលពីថ្ងៃទី២៨ មេសា ម្សិលមិញនេះ បានបើកប្រតិបត្តិចុះចាប់ខ្លួនឈ្មោះ កែវ មុនីរតន៍ ពាក់ព័ន្ធនឹងការឆបោកប្រាក់របស់អ្នកវិនិយោគទុនចិនក្នុងការទិញដីនៅក្នុងខេត្តកំពង់ស្ពឺដែលជាខេត្តកំពុងទទួលការចាប់អារម្មណ៍យ៉ាងខ្លាំងពីក្រុមអ្នកវិនិយោគទុនចិន ។
យោងតាមដីកាបញ្ជាឲ្យចូលខ្លួន ដែលចុះហត្ថលេខាដោយលោក វ៉ិត មឃៈ ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺ ចុះថ្ងៃទី២៨ ខែមេសា ឆ្នាំ២០២០ បានឲ្យដឹងថា ការឈានដល់ការចុះចាប់ឈ្មោះ កែវ មុនីរតន៍នេះ គឺធ្វើឡើងបន្ទាប់ពីបុគ្គលម្នាក់នេះមិនបានចូលឆ្លើយបំភ្លឺពាក់ព័ន្ធនឹងពាក្យបណ្តឹងរបស់ឈ្មោះ ហ្វូក ម៉ីងឈី (FU MINQI) ដែលបានប្តឹងពីបទ៖ ឆបោកមានស្ថានទម្ងន់ទោស តាមការកំណត់ក្នុងដីកាកោះរបស់តំណាងអយ្យការអមសាលាដំបូងខេត្តកំពង់ស្ពឺ ។
លោក វ៉ិត មឃៈ ព្រះរាជអាជ្ញារងនៃអយ្យកាអមសាលាដំបូងខេត្តកំពង់ស្ពឺ បានបញ្ជាក់នៅក្នុងដីកានោះថា ដីកានេះអនុញ្ញាតឲ្យមន្រ្តីនគរបាលយុត្តិធម៌ប្រើប្រាស់កម្លាំងសាធារណៈដើម្បីបង្ខំបុគ្គលនេះឲ្យចូលខ្លួនបាន ។
សូមបញ្ជាក់ថា ក្រោយការចាប់ខ្លួនឈ្មោះ កែវ មុនីរតន៍រួច ។ បុគ្គលនេះត្រូវបានកម្លាំងសមត្ថកិច្ចនៃស្នងការនគរបាលរាជធានីភ្នំពេញបញ្ចូនទៅស្នងការនគរបាលរាជធានីភ្នំពេញ ដើម្បីធ្វើកំណត់ហេតុប្រគល់ទទួល និងបញ្ជូនទៅសមត្ថកិច្ចនៃស្នងការនគរបាលខេត្តកំពង់ស្ពឺ ដើម្បីបន្តនីតិវិធីតាមផ្លូវច្បាប់៕
