ភ្នំពេញ៖ ឧកញ៉ា គិត ធាង ម្ចាស់មជ្ឈមណ្ឌលកម្សាន្ត Rock ដែលជាប់ពាក់ព័ន្ធនិងសំណុំរឿងគ្រឿងញៀនជាង៥០គីឡូ នៅមិនទាន់ចេញពីពេទ្យចូលទៅអនុវត្តទោសក្នុងពន្ធនាគារវិញ បើទោះបីជាត្រូវបានតុលាការផ្តន្ទាទោសរួចហើយក៏ដោយ ។ ឧកញ៉ា គិត ធាងនៅតែបន្តក្រាញននាលសម្រាកក្នុងមន្ទីរពេទ្យក្រោមហេតុផលមានជំងឺថប់ដង្ហើម និង ជំងឺសួត ដែលជាហេតុធ្វើឲ្យមហាជនមើលឃើញថា ឧកញ៉ារូបនេះ ហាក់មានសំណាងជាងជនជាប់ចោទដដៃ ។
ឧកញ៉ា គិត ធាង ត្រូវបានតុលាការផ្តន្ទាទោសដាក់ពន្ធនាគាររយះពេល៤ឆ្នាំប៉ុណ្ណោះ ក្រោមបទល្មើស ចាត់ចែងសម្រួលឲ្យមានការប្រើប្រាស់ដោយខុសច្បាប់ នូវសាធាតុញៀន និងបទសមគំនិត។ ចំណែក មនុស្ស២៤នាក់ផ្សេងទៀត ត្រូវបានតុលាការផ្តន្ទាទោសដាក់ពន្ធនាគារពី១ឆ្នាំ ដល់៤ឆ្នាំ ខណៈជនជាប់ចោទ២នាក់ទៀតត្រូវបានលើកលែងការចោទប្រកាន់ ។ មហាជនបានរិះគន់ទៅលើការសម្រេចផ្តន្ទាទោសឧកញ៉ារូបនេះ ដែលហាក់មិនសាកសមទៅនិងចំនួនគ្រឿងញៀនដែលសមត្ថកិច្ចបង្ក្រាបបានជាង៥០គីឡូ ក្នុងមជ្ឈមណ្ឌលកម្សាន្ត Rock ។ ភាគច្រើននៃអ្នកប្រព្រឹត្តបទល្មើស ជាប់ចោទ ជាប់ឃុំ ដែលជាអ្នកមានធនធានទ្រព្យសម្បត្តិ តែងតែលើកយកពីបញ្ហាជំងឺ និងបានទៅសម្រាកនៅមន្ទីរពេទ្យយ៉ាងស្រួល ។
ពាក់ព័ន្ធនិងមជ្ឈមណ្ឌលកម្សាន្តRock នេះ ឧកញ៉ា គិត ធាង
ធ្លាប់បានធ្វើកិច្ចសន្យាធានាអះអាងជាមួយអាជ្ញាធររាជធានីភ្នំពេញចំនួន២លើករួចមកហើយថា មិនអនុញ្ញាតឱ្យមានការជួញដូរ ចែកចាយ និងប្រើប្រាស់គ្រឿងញៀន ក្នុងទីតាំងអាជីវកម្មមួយនេះ ក៏ប៉ុន្តែឧកញ៉ារូបនេះបានបណ្តែតបណ្តោយឲ្យមានករណីជួញគ្រឿងញៀនក្នុងមជ្ឈមណ្ឌលកម្សាន្តRock រហូតដល់ថ្ងៃសមត្ថកិច្ចចុះបង្ក្រាប និងរឹបអូសបានគ្រឿងញៀនរហូតដល់ទៅជាង៥០គីឡូក្រាម និងឃាត់ខ្លួនមនុស្សបានចំនួន៣១១នាក់ ។
សូមជម្រាបថា ឧកញ៉ា គិត ធាង ត្រូវកម្លាំងនគរបាលចម្រុះនាំខ្លួនទៅស្នងការដ្ឋាននគរបាលរាជធានីភ្នំពេញ នៅព្រលប់ថ្ងៃទី១១ ខែមីនា ឆ្នាំ២០១៩ ពីភូមិគ្រឹះរបស់លោក ស្ថិតនៅផ្លូវលេខ២៨៩ ក្នុងសង្កាត់បឹងកក់១ ខណ្ឌទួលគោក។ ការនាំខ្លួនឧកញ៉ា គិត ធាង ម្ចាស់ទីតាំងអតីតមជ្ឈមណ្ឌលកំសាន្តរ៉ក (Rock)ដោយអនុវត្តតាមដីការបស់សាលាដំបូងរាជធានីភ្នំពេញ បន្ទាប់ពីមានប្រតិកម្មខ្លាំងៗពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។ នៅល្ងាចថ្ងៃទី១២ ខែមិនា ឆ្នាំ២០១៩ ចៅក្រមស៊ើបសួរនៃតុលាការក្រុងភ្នំពេញបាន ចេញដីកាបង្គាប់ឲ្យឃុំខ្លួនឧកញ៉ារូបនេះដាក់ពន្ធនាគារជា បណ្តោះអាសន្នហើយ ពីបទ សម្រួលឱ្យប្រើប្រាស់ដោយខុសច្បាប់នូវសារធាតុញៀន តាមមាត្រាមាត្រា៤៤ ច្បាប់ស្តីពីការត្រួតពិនិត្យគ្រឿងញៀន ។ មាត្រា៤៤ កថាខណ្ឌទី២ ច្បាប់ស្តីពីការត្រួតពិនិត្យគ្រឿងញៀនឆ្នាំចែងថា”អំពើជួលទីកន្លែង ផ្តល់ទីកន្លែង ឬ អំពើផ្សេងទៀត ដែលបង្កលក្ខណៈងាយស្រួលដល់ការប្រើប្រាស់ដោយខុសច្បាប់នូវសារធាតុញៀន គឺ ជាបទសម្រួលឱ្យប្រើប្រាស់ដោយខុសច្បាប់នូវសារធាតុញៀន ត្រូវផ្តន្ទាទោសពី៥ឆ្នាំទៅ១០ឆ្នាំ និង ពិន័យជាប្រាក់ពី១០លានរៀលទៅ២០លានរៀល ៕
