មិនដល់២ម៉ោងផង សមត្ថកិច្ចស្ទឹងមានជ័យទី៣ ក្របួចបានជនសង្ស័យ ឆក់យកទូរសព្ទដៃចំនួន២នាក់

រាជធានីភ្នំពេញ÷ ដោយមានការចង្អុលបង្ហាញពីលោកវរសេនីយ៍ឯក ម៉េងវិមានតារា អធិការនគរបាលខណ្ឌមានជយ័ លោកវរសេនីយ៍ត្រី ឯម ភារី នាយប៉ុស្តិ៍សង្កាត់ស្ទឹងមានជ័យស្ទឹងមានជ័យទី៣ ក្របួចបានចោរឆក់ចំនួន២នាក់

កាលពីវេលាម៉ោង ០៥ និង ៣០ នាទីព្រឹក ថ្ងៃទី ២១ ខែកញ្ញា ឆ្នាំ ២០២០ ជនសង្ស័យឈ្មោះអុឹម ម៉ាលី ហៅ ម៉ាប់ បានហៅម៉ូតូកង់បីឥណ្ឌារបស់ជនរងគ្រោះឈ្មោះ សេង មុត្តា ភេទ ប្រុស អាយុ ២៦ ឆ្នាំ ជិះពីចំណុចស្តុបសេះស ផ្លូវវេងស្រេង ភូមិដំណាក់ធំ ៣ សង្កាត់ស្ទឹងមានជ័យ ៣ ខណ្ឌមានជ័យ ទៅកាន់ម្ដុំផ្សារដីថ្មី ភូមិដំណាក់ធំ ២ សង្កាត់ស្ទឹងមានជ័យ ៣ ពេលដល់ចំណុចកើតហេតុជនសង្ស័យឈ្មោះ អុឹម ម៉ាលី បានឱ្យជនរងគ្រោះឈប់ម៉ូតូកង់បី ហើយបានធ្វើសកម្មភាពឆក់យកទូរស័ព្ទដៃមួយគ្រឿងម៉ាក Iphone H plus(អ៊េក ផ្លើស) ពណ៌ទឹកមាស ហើយបានរត់គេចខ្លួន យកទូរសព្ទដែលឆក់បានទៅឲ្យបក្ខពួកម្នាក់ទៀត ឈ្មោះ សំ រ៉ា ហៅ ម៉ៅ ដើម្បីយកទៅលក់។

លុះសមត្ថកិច្ចបានទទួលពាក្យបណ្ដឹងពីជនរងគ្រោះ នៅវេលាម៉ោង ០៨ និង ០០ នាទីព្រឹក ថ្ងៃខែឆ្នាំដដែល សមត្ថកិច្ចសង្កាត់ស្ទឹងមានជ័យទី ៣ បានចុះស្រាវជ្រាវឃាត់ខ្លួនបាន ជនសង្ស័យទាំងពីរនាក់ ទី១.ឈ្មោះ អុឹម ម៉ាលី ហៅ ម៉ាប់ ភេទប្រុស អាយុ ២០ឆ្នាំ មុខរបរ និងទីលំនៅមិនពិតប្រាកដ (មានផ្ទុកសារធាតុញៀន) ទី២.ឈ្មោះ សំ រ៉ា ហៅ ម៉ៅ ភេទប្រុស អាយុ២០ឆ្នាំ មុខរបរ និងទីលំនៅមិនពិតប្រាកដ (មានផ្ទុកសារធាតុញៀន) នៅចំណុចផ្លូវលំ ភូមិដំណាក់ធំ ២ សង្កាត់ស្ទឹងមានជ័យ ៣ ខណ្ឌមានជ័យ រាជធានីភ្នំពេញ។ ទូរស័ព្ទដៃត្រូវបានសមត្ថកិច្ចប្រគល់ជូនជនរងគ្រោះវិញហើយ

បច្ចុប្បន្នជនសង្ស័យទាំងពីរ កំពុងសាកសួរនៅទីស្នាក់ការប៉ុស្តិ៍ស្ទឹងមានជ័យទី ៣ ដើម្បីចាត់ការតាមនីតិវិធី។