ភ្នំពេញ៖ លោក កែវ សុធា ជាព្រះរាជអាជ្ញា នៃអយ្យការអម សាលាដំបូងរាជធានីភ្នំពេញ បានចោទប្រកាន់ឧកញ៉ាពីររូបក្នុងនោះមានឈ្មោះ ស្រី សុធា ភេទប្រុស អាយុ៦១ឆ្នាំ ជាប្រធានក្រុមប្រឹក្សាភិបាលក្រុមហ៊ុន 7NG និងឈ្មោះ ស្រី ចន្ធូ ភេទប្រុស អាយុ៣៨ឆ្នាំ ជានាយកក្រុមហ៊ុន 7NG ពីបទ ឆបោក ប្រប្រឹត្តនៅរាជធានីភ្នំពេញ កាលពីអំឡុងឆ្នាំ២០០៨ដល់២០១៩ តាមមាត្រា៣៩១ និងមាត្រា៣៩២ នៃក្រមព្រហ្មទណ្ឌកម្ពុជា, នេះបើយោងតាមដីកាបញ្ចូនរឿងឲ្យស៊ើបសួរ ចុះថ្ងៃទី១៦ ខែសីហា ឆ្នាំ២០១៩។
នៅក្នុងសេចក្តីសម្រេច លោកព្រះរាជអាជ្ញា កែវ សុធា បានស្នើឲ្យដាក់ឈ្មោះ ស្រី សុធា និងឈ្មោះ ស្រី ចន្ធូ ស្ថិតនៅក្រោមការឃុំខ្លួនបណ្តោះអាសន្ន ពោលគឺស្នើសុំឲ្យឃុំខ្លួន ឧកញ៉ាទាំងពីររូបនេះ កំពុងនៅក្រៅឃុំ។
ការស្នើសុំឃុំខ្លួននេះគឺដើម្បី បង្ការ ឬបញ្ចប់បទល្មើសកុំឲ្យកើតឡើងជាថ្មី និងធានារក្សាជនត្រូវចោទទុកជូនតុលាការចាត់ការតាមនីតិវិធី។
សូមជ្រាបថា កាលពីថ្ងៃទី១៨ ខែមិនា ឆ្នាំ២០០៨ ដើមបណ្តឹង ឈ្មោះ ឈុន ណាវី ភេទស្រី អាយុ៣៨ឆ្នាំ បានទិញដីទំហំ ១ហិតា ស្ថិតនៅភូមិព្រៃចាស់ ឃុំវិហារសួគ៌។
ដោយមានការទុកចិត្តដើមបណ្តឹង ឈ្មោះ ឈុន ណាវី ពុំបានទាមទារប័ណ្ឌកម្មសិទ្ធិពីឈ្មោះ ស្រី សុធា នោះទេ គឺមានឯកសារត្រឹមតែលិខិតផ្ទេរសិទ្ធិកាន់កាប់ដីប៉ុណ្ណោះ។លុះនៅដើមឆ្នាំ២០១៩ ឈ្មោះ ឈុន ណាវី មានបំណងធ្វើរបងថ្ម រឹងមាំ ជុំវិញដីរបស់ខ្លួន ស្រាប់តែឈ្មោះ ស្រី សុធា និងឈ្មោះ ស្រី ចន្ធូ ពុំមានដីដូចក្នុងទីតាំងខាងលើឲ្យឈ្មោះ ឈុន ណាវី ដែលជាដើមបណ្តឹងឡើយ
