ខេត្តកណ្តាល ៖ នៅព្រឹកថ្ងៃសៅរ៍ ៨រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១០ ខែតុលា ឆ្នាំ២០២០ ឯកឧត្តម ចាប វន្នី ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តកណ្តាល អញ្ជេីញជាអធិបតីភាពដ៏ខ្ពង់ខ្ពស់ ក្នុងពិធីបេីកវគ្គបណ្តុះបណ្តាលស្តីពី “ការសរសេរព័ត៌មានសន្តិភាព” ដែលប្រព្រឹត្តទៅ នៅសាលាបឋមសិក្សាព្រែកក្របៅ ស្ថិតក្នុងភូមិព្រែកក្របៅ ឃុំព្រែកអំពិល ស្រុកខ្សាច់កណ្តាល ខេត្តកណ្តាល។
នៅក្នុងវគ្គបណ្តុះបណ្តាលនេះ ក៏មានការរួមពីលោក ចាន់ តារា អភិបាលរងស្រុកខ្សាច់កណ្តាល លោក សាយ ទ្រី អធិការរងស្រុក ក្រុមប្រឹក្សាឃុំព្រែកអំពិល មេភូមិ នាយកសាលា លោកគ្រូ អ្នកគ្រូ យុវជន ស.ស.យ.ក. ស្រុកខ្សាច់កណ្តាល សិស្សានុសិស្ស និងអ្នកសារព័ត៌មានជាច្រេីនអង្គភាព សរុប ៥០នាក់។
ក្នុងឱកាសនេះដែរ ឯកឧត្តម ចាប វន្នី បានប្រសាសន៍ កោតសរសេីរជាខ្លាំង ចំពោះការរៀបចំវគ្គបណ្តុះបណ្តាលនេះឡេីង ព្រោះបានបញ្ជ្រាបឲ្យប្រជាពលរដ្ឋ មន្ត្រីរាជការ ក៏ដូចអ្នកសារព័ត៌មាន យល់អំពីសារព័ត៌មានសន្តិភាព។
សារព័ត៌មានសន្តិភាព មានបំណងទប់ទល់នឹងផលប៉ះពាល់ នៃសារព័ត៌មានហិង្សា។ សារព័ត៌មានសន្តិភាព គឺជាការប្រេីការវិភាគ និងដោះស្រាយទំនាស់ ដេីម្បីធ្វេីឲ្យទស្សនៈ នៃតុល្យភាព យុត្តិធម៌ និងសុក្រឹតភាព នៅក្នុងការរាយការណ៍ កាន់តែមានភាពប្រសេីរឡេីង។
សូមបញ្ជាក់ផងដែរថា វគ្គបណ្តុះបណ្តាលស្តីពី “ការសរសេរព័ត៌មានបែបសន្តិភាព” រៀបចំឡេីងដោយអង្គការក្រុមការងារដេីម្បីដោះស្រាយទំនាស់ ( ACT ) សហការជាមួយក្រុមការងារដែលមាន លោកព្រឹទ្ធាចារ្យ ហង្ស ចក្រា ចាងហ្វាងការផ្សាយគេហទំព័រ ខ្មែរម្ចាស់ស្រុក, លោក ឡេង ឡៃ ចាងហ្វាងកាសែតផ្កាយព្រឹក, លោក លី ប៊ុនលាង ចាងហ្វាងកាសែតកូននាគអាស៊ី, លោក ចុន វុត្ថា ជំនួយការកាសែតផ្កាយព្រឹក, លោក វិន ឈៀងមី ចាងហ្វាងការផ្សាយគេហទំព័រ ចក្រវាឡដេលីប៉ុស្តិ៍។
ចុងបញ្ចប់កម្មវិធី សិក្ខាកាមទាំងអស់ ក៏បានថតរូបអនុស្សាវរីយ៍ទុក និងស្រស់ស្រូបអាហារថ្ងៃត្រង់ ដេីម្បីបង្កេីនភាពស្និតស្នាល បង្កេីតចំណងមិត្តភាព និងផ្លាស់យោបល់គ្នាទៅវិញទៅមក រវាងប្រជាពលរដ្ឋ មន្ត្រីរាជការ ក៏ដូចអ្នកសារព័ត៌មាន ៕ 
