កម្លាំងកងអាវុធហត្ថស្រុកស្អាង តាមចាប់ខ្លួនស្រ្តីម្នាក់ឈ្មោះ ហុកស្រីណុច ដល់ក្រុងតាខ្មៅ

ខេត្តកណ្តាល៖ លោកវរសេនីយ៍ត្រី អ៊ូ ផល្លី មេបញ្ជាការកងរាជអាវុធហត្ថស្រុកស្អាង នៅព្រឹកថ្ងៃទី១៣ ខែវិច្ឆិកា ឆ្នាំ២០២០ នេះ បានដឹកនាំកម្លាំងតាមចាប់ខ្លួននារីម្នាក់ នៅចំណុចភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ។

លោកវរសេនីយ៍ត្រី អ៊ូ ផល្លី មេបញ្ជាការកងរាជអាវុធហត្ថស្រុកស្អាង ថ្លែងប្រាប់ថា នារីរូបនេះឈ្មោះ ហុក ស្រីណុច អាយុ២៦ឆ្នាំ ត្រូវបានសមត្ថកិច្ចចាប់ខ្លួនតាមដីកាបង្គាប់អោយនាំខ្លួនរបស់លោក ជួន វណ្ណៈ ចៅក្រមស៊ើបសួរសាលាដំបូងខេត្តកណ្តាល ក្រោមការចោទប្រកាន់ពីបទ (រំលោភលើលំនៅឋាននិងបរិហារកេរ្តិ៍ជាសាធារណៈ) ប្រព្រឹត្តនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល កាលពីថ្ងៃទី៦ ខែកុម្ភៈ ឆ្នាំ២០២០ តាមមាត្រា២៩៩ និង មាត្រា៣០៥ នៃក្រមព្រហ្មទណ្ឌ ។

លោកមេបញ្ជាការកងរាជអាវុធហត្ថស្រុកស្អាង បន្តថា ពេលនេះ នារីរូបនេះ ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកណ្តាល ដើម្បីចាត់ការបន្តតាមនីតិវិធី ៕