រាជធានីភ្នំពេញ៖ សមាជិកក្រុមប្រឹក្សាសង្កាត់ចោមចៅ១ គណបញ្ជាការឯកភាពសង្កាត់ចោមចៅ១ និងមេភូមិទាំងអស់ នៅក្នុងសង្កាត់ចោមចៅ១ ផ្តិតមេដៃ ទៅ ប្រធានគណៈកម្មាធិការបក្សប្រជាជនកម្ពុជា ខណ្ឌពោធិ៍សែនជ័យ ស្នើសុំផ្លាស់ប្តូរ លោក កង វង ដែលជាចៅសង្កាត់ចោមចៅទី១ នៃខណ្ឌពោធិ៍សែនជ័យ ដោយកន្លងមក តាមរយៈការដឹកនាំរបស់ លោក កង វង ចៅសង្កាត់ធ្វើអោយមន្ត្រីក្រោមឳវាទ មានការអស់ជំនឿទុកចិត្ត លើលោកចៅសង្កាត់ ដោយមានហេតុផលដូចខាងក្រោម៖
១ មានអាកប្បកិរិយា និងសីលធម៌មិនសមរម្យ ដោយតែងតែជេរប្រមាថតិះដៀល និងមើលងាយមកលើ មន្ត្រីក្រោមឳវាទ។
២ មានការប្រកាន់បក្ខពួក ដែលនាំអោយបែកបាក់សាមគ្គី និងឯកភាពផ្ទៃក្នុង។
៣ មិនចេះបែងចែកភារកិច្ចដល់សមាជិកក្រុមការងារ និងមន្ត្រីក្រោមឳវាទ។
៤ មានភាពពុករលួយ (ប្រាក់ចំណូល និងសម្ភារៈផ្សេងៗ មិនបានធ្វើការបែងចែកដល់កូនចៅ)។
៥ ទិសដៅការងារអ្វីមួយ មិនមានដាក់ក្នុងកិច្ចពិភាក្សានៅក្នុងអង្គប្រជុំនោះទេ គឺធ្វើការងារដោយអត្តនោម័តដោយខ្លួនឯង។
៦ គ្មានចរិកភាពជាអ្នកដឹកនាំរដ្ឋបាលសាធារណៈ និងសហគមន៍។
៧ ចំពោះការងារសាធារណៈ មានការយឺតយ៉ាវ និងពន្យាពេលវេលាអោយយូរដើម្បីទារប្រាក់ពីប្រជាពលរដ្ឋ។
៨ ចំពោះការងារបក្ស លោក កង វង ចៅសង្កាត់ចោមចៅ១ មិនបានយកចិត្តទុកដាក់ និងសហការណ៍ជាមួយគណៈកម្មការបក្សសង្កាត់អោយបានល្អប្រសើរនោះទេ។
ម្យ៉ាងវិញទៀត ចាប់តាំងពីលោក កង វង ចូលរួមជីវភាពជាមួយបក្សប្រជាជនកម្ពុជាមក (រយៈពេល៣ឆ្នាំ) លោក ពុំបានកសាងសមាជិកបក្សថ្មី បានមួយក្រុមបក្សណាមួយទេ។ ចំណែកឯ មន្ត្រីក្រុមការងារ ឬជំនួយការគណបក្សសង្កាត់ លោកមិនយកចិត្តទុកដាក់និងអើពើបញ្ហាប្រាក់ឧបត្ថម្ភតាមសំណើររបស់ប្រធានគណបក្សនោះទេ ទោះបីជាមានខ្ទង់ចំណាយសំរាប់គណបក្សសង្កាត់ក៍ដោយ។
យោងតាមលិខិត ដែលអង្គភាពព័ត៌មានយើង ទទួលបាន នៅថ្ងៃទី៨ វិច្ឆិកា ២០២០ នោះ សមាជិកក្រុមប្រឹក្សាសង្កាត់ចោមចៅ១ គណបញ្ជាការឯកភាពសង្កាត់ចោមចៅ១ និងមេភូមិ នៅក្នុងសង្កាត់ចោមចៅ១ ផ្តិតមេដៃមានដូចខាងក្រោម៖
១ ក្រុមប្រឹក្សា ៩/១១នាក់
២ មេភូមិ ទាំង៨ភូមិ
៣ មេភូមិរង ទាំង៨ភូមិ
៤ ជំនួយការភូមិទាំង៨
៥ ជំនួយការសង្កាត់ ៣នាក់
៦ ស្មៀនសង្កាត់ ១នាក់
៧ យុវជនសង្កាត់ ៧នាក់
អ្នកដែលបានផ្តិតមេដៃ ស្នើសុំផ្លាស់ប្តូរ លោក កង វង ដែលជាចៅសង្កាត់ចោមចៅទី១ នោះមាន៤១នាក់។ មន្ត្រីសាលាសង្កាត់ចោមចៅ១ បង្ហើបប្រាប់ថា នេះ ជាលើទី២ ហើយជុំវិញការផ្តិតមេដៃ ស្នើសុំផ្លាស់ប្តូរ លោក កង វង ជាចៅសង្កាត់ចោមចៅ១នោះ ហើយកំពុងរង់ចាំការពិនិត្យនិងសម្រេចពីថ្នាក់លើដែរ ពួកគាត់សង្ឃឹម ថ្នាក់លើនឹងមានសុភវិនិច្ឆ័យលើករណីខាងលើនេះ ។
អង្គភាពយើងខ្ញុំ នឹងរង់ចាំពន្យល់បកស្រាយពីសាម៉ីភាគីពាក់ព័ន្ធទាំងអស់៕
ចេញផ្សាយថ្ងៃទី២១ខែវិច្ឆិកាឆ្នាំ២០២០
