ព្រៃវែង ៖ គ្រោះថ្នាក់ចរាចរណ៍រវាងរថយន្ត៣គ្រឿងបុកគ្នា បណ្តាលឲ្យឆេះរថយន្ត២គ្រឿងទាំងស្រុង និងរងរបួសមនុស្ស២នាក់ នៅវេលាម៉ោង០១និង២០នាទី ថ្ងៃទី២៥ ខែកុម្ភៈ ឆ្នាំ២០២១ លើផ្លូវវាងក្រុង ក្នុងសង្កាត់កំពង់លាវ ក្រុងព្រៃវែង ។
តាមរបាយការណ៍របស់នគរបាលចរាចរណ៍បានឲ្យដឹងថា គ្រោះថ្នាក់នេះ បង្កឡើងដោយអ្នកបើកបររថយន្ដកូរ៉េដឹកទំនិញ បើកក្នុងស្ថានភាពងងុយដេក ក៏រេចង្កូតទៅបុករថយន្ដដឹកដីដែលមានទិសដៅបញ្ច្រាស់គ្នា បណ្ដាលឲ្យមានអគ្គិភ័យឆេះខ្លួនឯង (បើកបរដោយឈ្មោះ សៅ ស៊ីថា ភេទប្រុស អាយុ២៤ឆ្នាំ របួសជើងឆ្វេង និងអ្នករួមដំណើរ២នាក់របួសស្រាល) ។ រីឯរថយន្ដ ឆារ៉ូឡេត បើកបរក្នុងទិសដៅ ពីត្បូងទៅជើង បើកក្នុងល្បើនលឿន បានជ្រុលទៅបុករថយន្ដកូរ៉េដឹកទំនិញ ដែលកំពុងឆេះបណ្ដាលឲ្យឆេះខ្លួនឯងបន្តទៀត ។ រថយន្ដម៉ាក ឆារ៉ូឡេត បើកដោយឈ្មោះផុន សម្បត្តិ ភេទប្រុស អាយុ៣១ឆ្នាំ គ្មានរបួស។ សមត្ថកិច្ចបានឲ្យដឹងទៀតថា (រថយន្ដទាំង២គ្រឿង បានឆេះខូចខាតទាំងស្រុង)។ ចំណែកអ្នកបើកបររថយន្ដបែនដឹកដី បើកដោយឈ្មោះ គង់ សុភារ៉ែត ភេទប្រុស អាយុ២០ឆ្នាំ គ្មានរបួស ។
ក្នុងការឆាបឆេះនេះដែរ ក៏មានរថយន្ដពន្លត់អគ្គិភ័យ ២គ្រឿង ចេញមកអន្ដរាគមន៍ជួយបាញ់ទឹកពន្លត់ ដោយប្រើប្រាស់ទឹកអស់ ៣រថយន្ដ ទើបគ្រប់គ្រងសភាពការណ៍បាន៕
