ភ្នំពេញ៖)ស្ត្រីម្នាក់សម្រេចចិត្តចងកសម្លាប់ខ្លួន នៅក្នុងបន្ទប់ជួលចោលកូនទាំង០២ ឱ្យរស់នៅកំព្រាម្ដាយ បង្កឲ្យមានការភ្ញាក់ផ្អើលដល់ប្រជាពលរដ្ឋ កាលពីវេលាម៉ោង ១០និង០០នាទីព្រឹក ថ្ងៃទី១២ ខែសីហា ឆ្នាំ២០២១ ស្ថិតនៅខាងក្រោយសាលាសង្កាត់ស្ទឹងមានជ័យទី២នៅបន្ទប់ជួលមួយកន្លែង ក្នុងភូមិដំណាក់ធំ សង្កាត់ស្ទឹងមានជ័យទី០២ ខណ្ឌមានជ័យ រាជធានីភ្នំពេញ។
សពស្ត្រីរងគ្រោះខាងលើ មានឈ្មោះ មាស ស្រីគួង ភេទស្រី អាយុ២៩ឆ្នាំ មុខរបរលក់ដូរ និងលក់ផលិតផលតាមអនឡាញ បច្ចុប្បុន្នៈស្នាក់នៅក្នុងភូមិកើតហេតុខាងលើ មានស្រុកកំណើត នៅភូមិស្វាយដូនអី ឃុំស្វាយធំ ស្រុកស្វាយជ្រំ ខេត្តស្វាយរៀង ។
តាមប្រភពព័ត៌មានពីក្រុមគ្រួសារសាច់ញាតិ ស្ត្រីរងគ្រោះខាងលើនិងអ្នករស់នៅជិតបន្ទប់ជួលបានបង្ហើបប្រាប់ឲ្យដឹងថា ស្ត្រីរងគ្រោះមានកូនប្រុសស្រីតូចៗ ចំនួន០២នាក់ ចំណែកប្តីរបស់គាត់យូរៗ មកលេងកូននឹងប្រពន្ធម្តងម្កាលតែងតែរករឿងនិងប្រើអំពើហិង្សាមកលើប្រពន្ធរបស់ខ្លួនមិនចេះឈប់បុរសជាប្តីតែងតែគំរាមសម្លាប់ប្រពន្ធ និងកូនចោល ហេតុដូច្នេះហើយទើបជនរងគ្រោះមិនចង់រស់សំរេចចិត្តចងកសម្លាប់ខ្លួនឯងតែម្ដង។
ប្រភពដដែលបានបន្តឲ្យដឹងទៀតថា បុរសដែលជាប្តីជាអ្នកញៀនល្បែងហើយមិនចេះរកស៊ីអ្វីទាល់តែសោះហើយប្តីប្រពន្ធទាំង២នាក់ខាងលើនេះ រស់នៅមិនចុះសម្រុងនឹងគ្នានោះទេ បុរសជាប្តីតែងតែមកសំឡុតប្រពន្ធ យកលុយទៅលេងល្បែង បង្ហិនបង្ហោចទ្រព្យសម្បត្តិ ក្នុងគ្រួសារអស់រលីង ធ្វើឲ្យស្ត្រីជាប្រពន្ធទ្រាំ នឹងទង្វើប្តីលែងបាន ក៍សម្រេចចិត្តចង ក ធ្វើអត្តឃាតសម្លាប់ខ្លួនឯងតែម្ដងទៅ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ស្ទឹងមានជ័យទី២ សហការជាមួយកម្លាំងជំនាញខណ្ឌមានជ័យ រួមនិងកម្លាំងជំនាញការិយាល័យកោសល្យវិច័យ ស្នងការដ្ឋាននគរបាលរាជធានីភ្នំពេញ ចុះមកពិនិត្យសពស្ត្រីខាងលើ បន្ទាប់ពីពិនិត្យសពរួចរាល់ សមត្ថកិច្ចជំនាញ បានបញ្ជាក់ឲ្យដឹងថា សពស្ត្រីខាងលើនេះ ពិតជាចងក ធ្វើអត្តឃាតសម្លាប់ខ្លួនឯង ពិតប្រាកដមែន។
សពត្រូវបានសមត្ថកិច្ច ធ្វើកំណត់ហេតុ ប្រគល់ទៅឲ្យក្រុមគ្រួសារ ចាត់ចែងធ្វើបុណ្យតាមប្រពៃណី៕រក្សាសិទ្ធិ៖)ដោយវុត្ថា
