(ខេត្តឧត្តរមានជ័យ)៖ បន្ទាប់ពីមានសេចក្តីរាយការណ៍ពីពលរដ្ឋមានទីតាំងល្បែងស៊ីសងសង្វៀនជល់មាន់ និងបាញ់អាប៉ោងខុសច្បាប់មួយកន្លែងស្ថិតនៅចំណុចក្នុងចំការកៅស៊ូឆ្លងកាត់តាមបណ្តោយផ្លូវមុខបន្ទាយកងពលលេខ(៦) ប្រហែលជា៣គីឡូម៉ែត្រ ក្នុងភូមិដីក្រហម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ កំពុងបើកដំណើរការលេងល្បែងស៊ីសង ជល់មាន់និងបាញ់អាប៉ោងដោយភ្នាល់ដាក់លុយមួយគូៗរាប់លានរៀល និងបាញ់អាប៉ោងមួយគ្រាប់ៗ រាប់សិបម៉ឺនរៀល ព្រមទាំងស្រែកហ៊ោកញ្ច្រៀវទ្រហឹងអឺងកងតែគ្មានអាជ្ញាធរមានសមត្ថកិច្ចនិងមន្ត្រីជំនាញពាក់ព័ន្ធនៅក្នុងមូលដ្ឋានណាមួយចុះធ្វើការទប់ស្កាត់បង្ក្រាបឡើយគឺហាក់ដូចជា បណ្ដែតបណ្ដោយឱ្យក្រុមអ្នកញៀនល្បែងបើកលេងដោយសេរីយ៉ាងអនាធិបតេយ្យជាទីបំផុត។
គួររំលឹកផងដែរថា តាមប្រសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន នៅថ្ងៃទី១៧ ខែកញ្ញា ឆ្នាំ២០២២ កន្លងផុតទៅនេះ សម្តេចតេជោបានដាក់បញ្ជាយ៉ាងដាច់ណាត់ថា សមត្ថកិច្ចពាក់ព័ន្ធ ក៏ដូចជាអាជ្ញាធរមូលដ្ឋានត្រូវបង្ក្រាបឱ្យអស់នូវរាល់សកម្មភាពល្បែងស៊ីសងខុសច្បាប់គ្រប់ប្រភេទក្នុងមូលដ្ឋានរបស់ខ្លួនហើយថែមទាំងបញ្ជាក់ទៀតថា បើខេត្ត ក្រុង ស្រុកណាមានល្បែងសុីសងកើតមាន ចៅហ្វាយខេត្តក្រុងស្រុកនោះនឹងត្រូវប្រឈមនឹងការដកពីតំណែងថែមទៀតផង។
ដោយឡែកសមត្ថកិច្ចក្នុងមូលដ្ឋានហាក់ធ្វើព្រងើយមិនរវល់អើពើបង្ក្រាបទាល់តែសោះរីឯប្រជាពលរដ្ឋវិញកំពុងតែរង់ចាំមើល និងលើកជាសំនួរថា តើអាជ្ញាធរមានសមត្ថកិច្ចពាក់ព័ន្ធកំពុងបម្រើប្រជាពលរដ្ឋឬមួយបម្រើទីតាំងល្បែងសុីសង? តើអាជ្ញាធរក្នុងស្រុកត្រពាំងប្រាសាទបានគោរពនឹងបទបញ្ជារបស់សម្ដេចអគ្គមហាសេនាបតីតេជោ ហ៊ុន សែន ដែរឬទេ?
ចំណែកលោកអធិការស្រុកត្រពាំងប្រាសាទវិញបានថ្លែងថា កន្លងមករូបលោកក៏ធ្លាប់បញ្ជាកម្លាំងឱ្យចុះទៅបង្ក្រាបដែរប៉ុន្តែក្រុមនេះម្តងលេងកន្លែងនេះ ម្តងលេងកន្លែងនោះធ្វើឱ្យសមត្ថកិច្ចពិបាកនឹងរកទីតាំងពិតប្រាកដឃើញណាស់តែយ៉ាងណាក៏សូមអរគុណដល់អ្នកសារព័ត៌មានដែលបានជួយរាយការណ៍។
ប្រជាពលរដ្ឋក៏ដូចជាមហាជនជាច្រើនដែលរស់នៅក្នុងស្រុកត្រពាំងប្រាសាទ ខេត្តឧត្តរមានជ័យបានសូមអំពាវនាវទៅដល់ឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្ដរមានជ័យ ជាពិសេសឯកឧត្តម ហួត សុធី ស្នងការនគរបាលខេត្តឧត្តរមានជ័យ សូម ឯកឧត្តមជួយត្រួតពិនិត្យ និងដាក់បទបញ្ជាទៅលើអាជ្ញាធរមានសមត្ថកិច្ចក្នុងឃុំត្រពាំងប្រាសាទ ស្រុកត្រពាំងប្រាសាទឱ្យធ្វើការចុះទប់ស្កាត់ និងបង្ក្រាបទៅលើទីតាំងសង្វៀនជល់មាន់ខាងលើនេះផងទានដើម្បីគោរពតាមបទបញ្ជារបស់សម្ដេចតេជោ ហ៊ុន សែន និងស្របតាមគោលនយោបាយ ភូមិ/ឃុំ មានសុវត្ថិភាពទាំង ៧ ចំណុចរបស់ក្រសួងមហាផ្ទៃផងទាន៕
