ភ្នំពេញ៖ កាលពីម៉ោង២៖៣០នាទីយប់ឈានចូលថ្ងៃទី១៣ ខែកម្ភះ ឆ្នាំ២០២០ មានករណីគ្រោះថ្នាក់ចរាចរណ៍មួយតាមនៅបណ្ដោយផ្លូវ២១៧ ចំនុចគល់ស្ពានស្ទឹងមានជ័យ ក្នុងសង្កាត់ស្ទឹងមានជ័យ២ ខណ្ឌមានជ័យ បណ្ដាលឲ្យនារីម្នាក់ស្លាប់ពេលបញ្ជូនទៅមន្ទីរពេទ្យ ។ សពជនរងគ្រោះមិនត្រូវបានស្គាល់អត្តសញ្ញាណនៅឡើយ ។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញនារីខាងលើបានបើករថយន្តម៉ាស្ដា ពណ៌ស ពាក់ស្លាកលេខភ្នំពេញ2AO-66២6 ធ្វើដំណើរក្នុងទិសដៅពីលិចទៅកើតក្នុងល្បឿនលឿន ខណៈមកដល់ចំនុចកើតហេតុបានរេចង្កូតទៅបុកក្បាលរបាំងថ្មចែកទ្រូងផ្លូវបណ្ដាលឲ្យរថយន្តក្រឡាប់ផ្ងាជើង និងធ្វើឲ្យម្ចាស់រថយន្តរងរបួសធ្ងន់ ត្រូវរថយន្តគ្លីនិចឯកជនដឹកយកទៅសង្គ្រោះ តែអកុសលនារីនោះក៏បានដាច់ខ្យល់ស្លាប់ក្នុងមន្ទីរពេទ្យ ។
ក្រោយកើតហេតុសមត្ថកិច្ចមូលដ្ឋានបានទាក់ទងទៅជំនាញចរាចរណ៍ក្រុង រងចាំដោះស្រាយនៅពេលក្រោយ រីឯសពរងគ្រោះ ក្រោយពីសមត្ថកិច្ចធ្វើកោសល្យវិច័យរួចក៏ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
